يامن هواه أعزه وأذلني

ساعات و انا قاعد بتفرج على قناه روتانا طرب بيجى مغنى تونسى صوتوا مميز اسمه لطفى بوشناق المغنى ده كل حفلاته تقريبا فيها اغانى مش بتتغير خالص زى يا من هواه و بيضاء و توليفه من اغانيه فمره و انا قاعد لقيته بيغنى شعر قديم مسمعتوش قبل كده و الفاظ جديده عليا زى حشاشتى ( عرفت ان معناها قلبى فى الاخر ) كده يعنى فمهداش ليا بال روحت قاعد على جوجل و كتبت اللى فاكره من الاغنيه لقيته شعر من 280 سنه ايوه من 280 سنه لواحد من دوله البوسعيديون مش تبع بورسعيد بتاعتنا دى دوله كانت فى عمان المهم مش موضوعنا
قلت اجيب القصيده لقيت فيها معانى حلوه اوى بتعبر عن حبيب حبيبته هجرته بعد ما كانت كل حاجه فى حياته اسيبكم مع القصيده  وهى من كلمات الإمام سعيد بن الإمام أحمد بن سعيد بن أحمد بن سعيد بن أحمد بن محمد البوسعيدي اليمني الأزدي 

يا من هواه أعزه وأذلنـــي كيف السبيل إلى وصالـــــك دلني

وتركتني حيران صبّا هائم أرعى النجوم وأنت في نوم هني

عاهدتني ألا تميل عن الهوى وحلفت لي يا غصن ألا تنثني

هبّ النسيم ومال غصن مثله أين الزمان وأين ما عاهدتني

جاد الزمان وأنت ما واصلتني يا باخلاَ بالوصل أنت قتلتني

واصلتني حتى ملكت حشاشتي ورجعت من بعد الوصال هجرتنى

لما ملكت قياد سري بالهوى وعلمت أني عاشق لك خنتنى

فلأقعدن على الطريق فأشتكي في زي مظلوم وأنت ظلمتني

ولأشكينك عند سلطان الهوى ليعذبنك مثل ما عذبتني

ولأدعين عليك في جنح الدجى فعساك تبلى مثل ما أبليتني

و قد اخذ منها لطفى بوشناق بعد الابيات و قام بغنائها فغنى 

يا من هواه اعزه واذلني
كيف السبيل الى وصالك دلنى 
وصلتنى حتى ملكت حشاشتى 
و رجعت من بعد الوصال هجرتنى 
الهجر من بعد الوصال قطيعه 
فياليتك قبل الوصال قد اعلمتنى
انت الذى علمتنى و حلفت لى 
وحلفت بأنك لن تخون فخنتنى  
فلاقعدن على الطريق و اشتكى كشبيه مظلوم و ليت ظلمتنى 
و لندعون عليك ف غسق الدجى يبليك ربى مثلما ابليتنى 

قلبك بقا انتيكه فى بيتها

متستغربوش ده اسم اغنيه لفرقه وسط البلد و اللى مش عارف الفرقه دى غنت فى فيلم عوده الندله ( استفتاح
بتاع عبله كامل و عزت ابو عوف

المهم يا جماعه انا و لا كنت شفتهم قبل كده و لا كنت سمعت ليهم اكتر من الاغانى اللى غنوها فى الفيلم
مره قاعد على قناه مزيكا من كام شهر لقيت اصاله فى حفله معاهم تقريبا كان اسمها اصاله فى وسط البلد و انا بصراحه بحب اصاله
لقيتها بتقول و حتفضل على طول لعبتها اكمنك دبت و حبتها
قعدت ادور فى دماغى على اغنيه بتاعتها اولها كده فقلت لاء مبدهاش نسمعها و خلاص
المهم لقيت اغنيه سلسه كلامها جديد على ودانى
و بصراحه لقيتها بترد على الاغانى بتاعه تمرد المرأه فى اغانيها
و هى عباره عن صاحب بينصح صاحبه من حب واحده و بيقوله


و هتفضل علي طول لعبتها
إكمنك دُبت و حبتها
إكمنك صدقت عينيها
و بقت روحك تجري عليها

قلبك بقى انتيكه قي بيتها

بص لقلبك و إسأله ليه ؟
إيه جواها بتجري عليه
يا بني دي قلبها عمره ما حبك !!
و لا مليون سنه راح تعدلها
اكمنك صدقت عينيها
و بقت روحك تجري عليها
قلبك بقى انتيكه في بيتها

لما تقولك ابكي بتبكي
و اما تقولك اضحك تضحك
قولي يا تري كده عاجبك نفسك
لما تتوه وسط محبتها ؟
إكمنك صدقت عينيها ..
و بقت روحك تجري عليها
قلبك بقى أنتيكه في بيتها

أغنيه جديده بفكره جديده بكلمات جديده و صوت اصاله اضاف ليها حاله جديده
بصراحه عجبتنى اكتر بصوت اصاله عن صوت تقريبا هانى عادل اللى كان بيغنيها من فرقه وسط البلد فى شريطهم وسط البلد 2008

غريبه الناس غريبه الدنيا ديا

مش عارف انا ايه الاغانى اللى تنكد على الواحد دى يا ساتر يا رب الواحد نفسه يسمع شريط كله فرايحى لازم يعنى كل شريط يبقى فيه اغانى تنكد عليك
المهم قولت من كام شهر ننزل شريط وائل جسار الجديد و قعدت اشوف اسم الاغانى بينى و بينكم انا بيشدنى اسم المؤلف لقيت اغنيه بتاعه ايمن بهجت قمر و نادر عبد الله قلت اشغلهم شغلت بتاعه ايمن بهجت قمر
لقيت الاغنيه بصراحه نكد رهيب و فعلا صوت وائل جسار بيديك واحد مكسور فعلا و كأنه موجود فى الحاله دى
حبيب تهجره حبيبته بعد ما كانت كل شىء فى دنيته
حاله رهيبه عيشناه فيها ايمن بهجت قمر


غريبة الناس غريبة الدنيا ديا اعز الناس بيتغير عليا
مفيش احساس مفيش ولا ذكرى ليا
خلصنا خلاص انا ماشى وجيبها فيا
لو كنت عملت خاطر ليوم حلو عيشناه
فى كده معقول ياساتر مفيش كده فى الحياة
غريبة الناس غريبة الدنيا ديا اعز الناس بيتغير عليا

فى اول مقطع بيعاتب حبيبته و بيقولها انتى نسيتى كل اللى ما بينا نسيتى الايام الحلوه
و كأنه بيقولها ده انتى طلعتى قليله الاصل بشكل

سنين عايشين بموت لو االاقى جرحك
لااغمض عين ولا اهدى الا اما تضحك
صبرت سنين فى همك قبل فرحك
اسامح مين روح انت الله يسامحك
الومك ليه مش فارقة ماهى هى
ده لزمته ايه خلاص حقك عليا
فاكرنى ملاك وهنسى القسوة ديا
ده انا هنساك ومش هنسى الاسية

و الحته دى بقا بيحكى ازاى كان بيعاملها و ازاى كان بيخاف عليها
و فى الاخر بيقولها حنساكى اه بس مش حنسى اللى انتى عملتيه معايا

اه اغنيه جامده بس الواحد مش ناقص نكد يا مطربين ارحمونا بقى

مش عارف اكتب ايه

مش عارف اكتب ايه حاجات كتير فى دماغى
فى دماغى موضوع عن الصداقه
و فى دماغى موضوع عن الخيانه
و فى دماغى موضوع عن اغانى معينه
و فى دماغى موضوع عن مصر
مش عارف ابدأ منين و لا منين
كل ما احاول ابدا موضوع الاقى نفسى اتشتت
حاولت اكتب مره و اتنين و تلاته
مش عارف كله ساح على بعضه

بس قولت حكتب و خلاص و زى ما تيجى تيجى 

كلمات اعجبتنى

قولت النهارده احط كده حبه كلام عسل حبه كلام عجبنى قولت احطهم فى المدونه على الماشى

أن تضيء شمعة صغيرة خير لك من أن تنفق عمرك تلعن الظلام
لا تفكر في المفقود حتى لا تفقد الموجود
لا داعي للخوف من صوت الرصاص .. فالرصاصة التي تقتلك لن تسمع صوتها
قوة السلسلة تقاس بقوة اضعف حلقاتها .
لا يوجد رجل فاشل ولكن يوجد رجل بدأ من القاع وبقى فيه.
الطفل يلهو بالحياة صغيراً دون أن يعلم ان الحياة سوف تلعب به كبيراً.
إذا استشارك عدوك فقدم له النصيحة، لأنه بالاستشارة قد خرج من معاداتك إلى موالاتك.
عندما يقول لك إنسان انه يحبك مثل أخيه تذكر قابيل وهابيل.

يوميات موزع فى الوسيط

الوسيط عشان اللى ميعرفهوش جريده اسبوعيه فيها اعلانات عن كل حاجه من اول الكلاب و الققط لغايه العمارات و الشقق

المهم الموزع ده يا عينى بيطلع عينه فى اليوم اللى بينزل فيه الوسيط بيلف على البيوت و المحلات من الساعه 8 لغايه ميخلص الكميه
يعنى لو 1200 جريده وسيط ممكن يخدهم فى 4 ساعات أأقل واجب
المهم ان الناس فاكره انه بياخد كده عدد و خلاص و زى ما يجى يجى او بيروح بالباقى بيتهم و يوزعهم
او يبيعهم لحد تانى
و اجارك الله على الشتيمه اللى بياخدها من الناس
و هو يا عينى غلبان الاوامر عنده متديش لحد فى الشارع
و يا ويله يا سواد ليله لو مراقب عليه شافه حسب بقا المراقب خصومات و حاجات عجيبه كده
الناس طبعا مش مصدقه الموزع يقولهم يا جماعه مينفعش و الله اديكم واحده يقولوا واحده حتعمل ايه دى مجانيه يا عم مش عاوزين من وشك حاجه
و اللى يقوله يا عم احنا حنشحت منك
المشكله ان الشعب المصرى او اى شعب فى الدنيا بيطبق مثل ابو بلاش كتر منه يعنى لو الموزع الغلبان ده عطاله واحده ممكن يقولوا طب واحده لابنى
طب يا عم اقراها و اديها لابنك بعد كده
و لو عطيط لواحد مره خلاص لازم تديله الاسبوع الجى و اللى بعديه
و لو عطيط لواحد كده عشان صعب عليك تلاقى مليون واحد طلعولك من حيث لست تدرى
مش عارف أنا الناس بتطلع منين
بس كميه دعا بقا بياخده الموزع ده اجاركم الله
و يعنى الموزع ده مش عاوز يخلص الكميه اللى معاه مش عاوز يروح بدرى عاجبه اللفه فى الشمس و فى الشتا
لا و اللى يغيظك الناس اللى تقولك مش عارف انا بيتأمروا على ايه الله يرحم زمان لما كانوا بيتحايلوا على الناس عشان ياخدوا الوسيط
و الله انا نفسى اشوف زمان دى كان شكله ايه
المهم يا جماعه ان الموزع ده ماشى على خريطه ايوه خريطه مستغربين ليه اه و الله خريطه فيها البيوت و المحلات اللى يوزعها
و البيوت اللى يطلعها و البيوت اللى ميطلعهاش
و البيوت اللى يديها للامن و اللى يطلعها
يعنى عمليه ماشى على طريقه اداريه منظمه مش اى كلام
فالبيوت و المحلات على قد الكميه اللى معاه ممكن يبقى فيه حبه زياده
و ممكن تنقص منه الكميه على حسب بقا التوزيع بتاعه
فالموزع مش بيقدر يدى لحد حاجه قبل ما يخلص منطقته و لو خلصت ايه يعنى لو عطا للناس يبقى لا ضرر و لا ضرار
بمعنى انه مش حيضر الموزع بدل ما هو خلص منطقته ببيوها بمحلتها
فبالراحه يا جماعه على موزعين الوسيط
ممكن الجرنان اللى انتا عاوزه ده يبقى بتاع حد تانى متقيد فى الشركه انه يوصله
و لو هو عطاه ليك ممكن يجيلوا خصم نتيجه لشكوى اللى موصلهوش

فيا جماعه متحملوش الراجل فوق طاقته و ارحموه من الزن بتاعكم

زمان و انا صغير

و انا قاعد مره فى قهوه لقيت صوت جى من موبايل بأغنيه كنت بحبها زمان اسمه زمان و انا صغير لهشام عباس
ياه افتكرت الاغنيه دى و سرحت
حاله من الاكتئاب و الحزن فى الاغنيه دى
كالعاده طبعا روحت دورت عليها و على كلمتها لقيت الاغنيه دى بتمثل اى حلم لاى شاب انه يكبر لكن لما يكبر يكتشف ان الحياه مش زى ما هو عاوزها و الاحلام بتاعته صعب انها تتحقق و حب الطفوله راح لحاله
و زى ما بيقول لقيت الكون كله بيتغير
قلت ياريتني
فضلت صغير
و يا خساره يا ريت عمرها ما ترجع اللى فات من العمر

زمان وكان يا ما كان

زمان وكان يا ما كان

كان الزمان إنسان
دلوقتي ليه يا زمان
مبقتش زي زمان
.
طيب يا صبر طيب
.
يرحم زمان
وليالي زمان
.
والناس
يا متهني
يا فرحان
.
الدنيا كانت
وردة وشمعه
ولسه مخترعوش أحزان

*
صدقني يا صاحبي
كان الزمان صاحبي
أيام مـ كان إنسان
*
طيب يا صبر طيب

والدنيا فبريكه بتفرم الإنسان
قصدي اللي كان إنسان
طيب يا صبر طيب


مش عارف ليه حاسس بالحزن اللى كان فيه عبد المنعم مدبولى بيغنى فيه الاغنيه دى

يا رجال العالم احترسوا من اغانى الايام دى

اغنيه جديده اسمها حبيبى على نياته نزله اغنيه فرديه لجنات كلمات بهاء الدين محمد
فى شريط good news 4 music vol 1
هى مش جديده اوى بس كلام جديد
على الجنس الناعم قصدى اللى كان ناعم

الاغنيه دى بقا بالذات تندرج تحت اغانى و منرفزانى
اول الاغنيه اسطباحه زى العسل بتقول المعلمه جنات فى وصف حبيبها

حبيبي علي نياته كل البنات اخواته ده مكنش كده
بس انا غيرت كل حياته
دلوقتي عايشها جد
وعيونه مش شايفه حد
لو واحده بتساله بيسبني انا الي ارد

يا سلام ايه الخضوع ده يا ترى بجد فيه رجاله كده
و لا هى واخده قلم فى نفسها و لا ايه
ليه ميردش معندوش لسان
لا و الانقح الحته الجيه

يا اخواتي عليه يا اخواتي
دي برأته ماليه حياتي
الي بنظره كان يتشد
وبرأته كانت ملهاش حد
بيسلم وعنيه في الارض

يا عينى علمته الادب و خلته يبص فى الارض و ميبصش فى عين الناس
و هو بيسلم عليهم لحسن تمنع عنه المصروف و لا يمكن حاجه تانيه
تسيبه و تمشى و لا تقولوا بيباى انا لو منه فى ستين داهيه
البنات على قفا مين يشيل لامؤاخذه يعنى
و لا يمكن مسكه عليه ذله و لا حاجه
الله اعلم برضه عشان منظلمش الراجل
فينك يا سى السيد تشوف بيتعمل ايه فى الرجاله من بعدك

أغنيه جميله و لذيذه بس
هل هى رساله بتعلن فيها المرأه تمردها على الرجل
هل هى رساله من المرأه للرجل بتقولوا خلى بالك
حنبقى احنا سى السيد و الرجاله أمنه

غريبه غريبه غريبه و مش غريبه

دى اغنيه لمحمد منير فى تانى شريط ليه بنتولد و كانت من كلمات
مجدى نجيب و من الحان هانى شنوده الاغنيه دى مش عارف ايه اللى مدخلها فى دماغى كلمتها غريبه بجد
انا بصراحه بحب كذا مقطع مع بعض برضه حاسس ان فيها مليون احساس مع بعض حب جنون موت شجن يأس مش عارف فيها ايه اغنيه معفرته مع انها كلها على بعضها 3 دقايق بس بتودينى بعيد اوى كل ما اقول ان انا فهمتها الاقى حاجه تانيه مش عارف افهمها

و الغربيه ان الشاعر ماشى على قافيه واحده و بيتعامل مع كل مقطع كأنه قصيده لوحدها
نفس النهايات بتاعه السطور
نفس السطر الاول و نص التانى و الاخير فى كل مقطع
مش عارف بس هى بجد اغنيه غريبه غريبه و مش غريبه



و دى كلمات الاغنيه



غريبة

غريبة غريبة ، غريبة ومش غريبة
انى اكون ويا الحبيبة
دنيا مبتسمة ورحيبة
وفجأة اكون زى القلوع
ساعة الغروب مروحين
بلا شطوط ولا حنين
وانطفى فى الحال من غير سؤال

غريبة غريبة ، غريبة ومش غريبة
انى اكون فى لحظة مخيفة
خبر كان وسط الصحيفة
وفجأة اكون زى السطور المليانين
بحاجات كتيرة منورين
وانطفى فى الحال من غير سؤال

غريبة غريبة ، غريبة ومش غريبة
انى اكون خطوة بريئة
لما ادور على الحقيقة
وفجأة اكون زى الجنون جوة العيون
مالهوش كون مالهوش لون
وانطفى فى الحال من غير سؤال

موضوع جميل حبيت اكتبه هنا

الموضوع حوار بين ذكر و انثى اسيبكم مع الحوار الجميل ده


قال لها: ألا تلاحظين أن الكون ذكراً؟
فقالت له: بلى لاحظت أن الكينونة أنثى!


قال له: ألم تدركي بأن النور ذكرا ً؟
فقالت له: بل أدركت أن الشمس أنثى!


قال لها: أوليس الكرم ذكرا ً؟
فقالت له: نعم ولكن الكرامة أنثى!


قال لها: ألا يعجبك أن الشِعر ذكرا ً؟
فقالت له: وأعجبني أكثر أن المشاعر أنثى!


قال لها: هل تعرفيـن أن العلم ذكرا ً؟
فقالت له: إنني أعلم أن المعرفة أنثى!






فأخذ نفسا ً عميقا ًوهو مغمض عينيه ثم عاد ونظر إليها بصمت للحظات وبعد ذلك.

قال لها: سمعت أحدهم يقول أن الخيانة أنثى.
فقالت له: ورأيت أحدهم يكتب أن الغدر ذكرا.


قال لها: ولكنهم يقولون أن الخديعة أنثى.
فقالت له: بل هن يقلن أن الكذب ذكرا ً.


قال لها: هناك من أكّد لي أن الحماقة أنثى
فقالت له: وهنا من أثبت لي أن الغباء ذكرا


قال لها: أنا أظن أن الجريمة أنثى
فقالت له: وأنـا أجـزم أن الإثـم ذكرا ً


قال لها: أنا تعلمت أن البشاعة أنثى
فقالت له: وأنا أدركـت أن القبح ذكرا


قال لها: يبدو أنك محقة فالطبيعة أنثى
فقالت له: وأنت قد أصبت فالجمال ذكراً


قال لها: لا بل السعادة أنثى
فقالت له: ربما ولكن الحب ذكـرا


قال لها: وأنا أعترف بأن التضحية أنثى
فقالت له: وأنا أقر بأن الصفـح ذكرا


قال لها: ولكنني على ثقة بأن المحبة أنثى
فقالت له: وأنا على يقين بأن القلب ذكرا

لو عملت مدونه حتعملها ليه

مش عارف اول مره كده اتشجع و اكتب اللى انا عاوز اقوله على النت الزهق ممكن مش عارف تغيير برضه مش عارف بس المهم اللى فى دماغى بكتبه مش مشكله الناس يعجبها اللى بقوله المهم انا بتكلم انا بكتب مش فارقه بقا اى حاجه تانيه
مش عارف كنت خايف من التجربه و لا ايه مع انى شايف حكايه المدونات دى من زمان اوى اوى بس محاولتش كنت بكتب فى ورق و اقطعه بس قولت وماله تجربه اهو ندخل فى حاجه جديده
يا ترى انتا لو عملت مدونه حتعملها ليه او عملتها ليه

اه و اه من جبروت المرأه

زمان كنت تسمع الاغانى اللى بتغنيها المغنيات كلها خضوع للحبيب و حب للحبيب و تضحيه للحبيب دلوفتى حصل تمرد فى الجنس الناعم بقت واحده تقولك انا شايفه ان اخرى معاك كده و اللى تقوله يوم ليك و يوم عليك لذكرى
اللى تقوله اسكت بقا لاصاله
و اللى تهدده زى اغنيه اه لو جانى تانى لشرين عبد الوهاب و اغنيه عارف انا جيه ليه لزيزى عادل
و اغانى كتير اوى اوى و لا الاغنيه اللى طلعها جديد بتاعه جنات بتاعه حبيبى على نياته تحس ان الراجل يا عينى غلبان اوى و خلاص بقا فى صباعها زى الخاتم و دى حكلمكم فيها فى موضوع لوحده
عشان غيظانى اوى الاغنيه دى
انا قولت الاغانى دى بس بالمصرى لقيت ان الموضوع انتشر حتى فى لبنان اغنيه قال شو عبالو بتاعه ساره الهانى

اه الاغانى القديمه كان فيها كده بس بعد ما تشمت فيه شويه ترجعله زى اغنيه ايظن و اغنيه ماذا اقول له لنجاه الصغيره
و الاغانى القديمه بتاعه ام كلثوم زى و دارت الايام وورده و فايزه احمد و ماجده الرومى و سميره سعيد ايام زمان كانت اغانى حب و عتاب بسيط مش زى دلوقتى ناقص تضربه و لا تخلعه
اه مش القانون عطاهم حق الخلع
فى اخر الموضوع حقول حته من اغنيه لورده
و يعوض الله يعوض الله

ايزى موزو

مش عارف انا الشباب اللى انا منهم طبعا ليهم مصطلحات غريبه اللى يقولك فكك نفض احلق مش عارف ايه مصطلحات غريبه الشكل و الله
قولت طب ان ليه ميكنش ليه مصطلح لذيذ ظريف خفيف
هو اللى عمل طنش و لا نفض احسن منى
مش عارف ايه اللى فكرنى بأعلان فرج الله على العصير اللى اسمه ايزى موزو
فبدأت اقول بدل فكك و لا كبر ايزى موزو بمعنى عديها او خلاص قفل على الموضوع الموضوع منتهى
و بقه كلمه فى بقى قولت اشوف اللى حيحصل
و فى خلال اسبوع لقيت صحابى كلهم بيقولوها الظاهر عجبتهم
و ناس تقولى سمعناها قبل كده اقولهم اه فى اعلان فرج الله
المشكله كل جيل بيطلع كلمات غريبه كده زمان كان فيه صهين تقريبا نفس المعنى لكلمه كبر و فكك
و كان فيه احلق و طنش و لا دى كلمات جديده
يا لا مش مشكله ايزى موزو

مع اخر حاجه فى دماغى النهارده

النهارده كانت دماغى متكربسه كربسه سودا فكتبت كتير فى مواضيع كتير قولت فى الاخر انقل كده حبه كلمات قريتهم النهارده و عجبونى اوى


إذا كانت لك ذاكرة قوية ..وذكريات مريرة.. فأنت أشقى أهل الأرض


لا يجب أن تقول كل ما تعرف ... ولكن يجب أن تعرف كل ما تقول..

لا تبصق في البئر فقد تشرب منه يوما

ليس من الصعب أن تضحي من أجل صديق ..ولكن من الصعب أن تجد الصديق الذي يستحق التضحية !

الحياة مليئة بالحجارة فلا تتعثر بها بل إجمعها وابنِ بها سلما تصعد به نحو النجاح

إنه من المخجل التعثر مرتين بالحجر نفسه

للذكاء حدود لكن لا حدود للغباء

و بكره لو فيه حاجه جديده حكتبها

مش انا حر اكتب اللى انا عاوزه

سلام

اغانى و عجبانى 2

زمان و انا صغير كنت لما امشى فى الشارع ساعات اسمع صوت جميل عمال يقول
الطفل فى المغارة وأمه مريم
وجهان يبكيان
يبكيان لأجل من تشردوا
فبصراحه الكلام علق فى دماغى فسألت جدى مين اللى غنى الاغنيه دى قالى فيروز و بدأ عشقى لفيروز من وانا عندى 10 سنين تقريبا صوت ملائكى و نادر و خصوصا ان اغانيها كلها صغيره بالمقارنه بنجوم جيلها مش عارف ايه اللى فكرنى بأغنيه زهره المدائن اللى اعتقد انها من كلمات و الحان الاخوان الرحبانى
اول مره كنت اسمعها كامله فى برنامج عمار الشريعى غواص فى بحر النغم
لما مكنتش بروح المدرسه كنت بفتح الراديو و اسمع
البرنامج الرائع ده و تعليقات عمار الشريعى الرائعه على الاغانى اللى بيجيبها
قولت احطها ضمن اغانى و عجبانى عادى يعنى
و قولت بالمره اكتب كلمتها



لأجلك يا مدينة الصلاه أغني
لأجلك يا بهية المساكن
يا زهرة المدائن

يا قدس
يا مدينة الصلاه أصلي

عيوننا إليك ترحل كل يوم
تدور فى اروقة المعابد
تعانق الكنائس القديمة
وتمسح الحزن عن المساجد

يا ليلة الإسراء
يا درب من مروا الى السماء
عيوننا اليك ترحل كل يوم
وانني اصلي

الطفل فى المغارة وأمه مريم
وجهان يبكيان
يبكيان لأجل من تشردوا
لأجل اطفال بلا منازل
لأجل من دافع واستشهد فى المداخل
واستشهد السلام فى وطن السلام
وسقط العدل على المداخل

حين هوت مدينة القدس
تراجع الحب
وفى قلب الدنيا استوطن الحرب

الغضب الساطع أتٍ
و انا كلى أمان
الغضب الساطع أت
سأمر على الاحزان
من كل طريق آتٍ
بجياد الرهبة آتٍ
وكوجه الله الغامر آتٍ

لن يقفل باب مدينتنا
فأنا ذاهبة لأصلي
سأدق على الابواب
وسأفتح هالابواب
وستغسل يا نهر الاردن
وجهي بمياه قدسية
وستمحو يا نهر الاردن
آثار القدم الهمجية
وسيهزم وجه القوة

البيت لنا والقدس لنا
وبأيدينا سنعيد بهاء القدس
بأيدينا للقدس سلام
للقدس سلام

اغانى و عجبانى

مع انى مش من هواه انى اسمع ام كلثوم الا انه كان بيعجبنى و انا صغير لما اكون عمال اقلب فى الاذاعه او قاعد مع اى حد كبير اغنيه بتقول ام كلثوم فيها
اعطنى حريتى اطلق يدى اننى اعطيت ما استبقيت شىء
الا انى كبرت و نسيت المقطع ده لكن فى مره و انا بفتح الفيس بوك لقيت حد من اصدقائى حاططها حاله او زى ما بيقولوا كده هناك
status
المهم قلت بقا مبدهاش اسأله حلوتها فى حموتها زى ما بنقول قلتله يا باشا الحته دى فى انهى اغنيه قلى فى الاطلال أمت على طول جارى على ملف اغانى ام كلثوم و فتحته و اخترت الاغنيه و بدأت اسمع حاله رهيبه من الاداء و الكلمات و الالحان من الاخر اغنيه اسطوره
بينى و بينكم انا الاغنيه اللى تعجبنى او القصيده ادور عليها كلمات بمخمخ اكتر لما افهمها المهم لقيتها
بصراحه قعدت اسمع فى الاغنيه دى اكتر من اسبوع كل يوم اكتر من 3 او 4 ايام ورا بعض لغايه محفظت معظمها
حاله من الشجن والبكاء على الاطلال و قوه الحبيب و الحب و وصف الحبيب ووصف اللقاء المتوهم و اكتشاف الحقيقه و الفراق
حاله رهيبه بجد مسمعتهاش ف اى اغنيه و لا قريتها فى اى قصيده من اللى قريتها
قلت ادور على القصيده اللى جت منها الاغنيه التحفه دى لقيتها قصيده الاطلال و قصيده الوداع لابراهيم ناجى
قصيده فيها 130 بيت + قصيده فيها 27 بيت
ازاى اتحطوا على بعض الله اعلم بس المهم انهم اتحطوا مع بعض
المهم انا قولت اعرض الجزء اللى غنته ام كلثوم و بس غلاسه يعنى





يا فؤادي لا تسل أين الهوى
كان صرحاً من خيالٍ فهوى

اسقني واشرب على أطـلال
واروا عني طالما الدمع رواه

كيف ذاك الحب أمسى خبراً
وحديثاً من أحاديث الجـوى

لست أنساك وقـد أغريتنـي
بفمٍ عـذب المنـاداة رقيـق

ويـدٍ تمتـد نحـوي كـيـدٍ
من خلال الموج مدّت لغريق

وبريقٍ يظمـأ السـاري لـه
أين في عينيك ذيّاك البـري

يا حبيباً زرت يومـاً أيكـه
ائر الشـوق أغنـي ألمـي

لك إبطـاء المـذل المنعـم
وتجنـي القـادر المحتكـم

وحنيني لك يكوي أضلعـي
والثواني جمرات في دمـي

أعطني حريتي أطلـق يديـا
إنني أعطيت ما استبقيت شيئا

آه من قيدك أدمى معصمـي
لم أبقيه ومـا أبقـى عليّـا

مع احتفاظي بعهود لم تصنها
وإلام الأسـر والدنيـا لديّـا

أين من عيني حبيب ساحـر
فيـه عـز وجـلال وحيـاء

واثق الخطوة يمشـي ملكـاً
ظالم الحسن شهي الكبريـاء

عبق السحر كأنفاس الربـى
ساهم الطرف كأحلام المساء

أيـن منـي مجلـس أنـت
بفتنة تمـت ستـاء وسنـاء

وأنـا حـب وقلـب هـائم
وفـراش حائـر منـك دنـا

ومن الشوق رسـول بيننـا
ونديـم قـدم الكـأس لـنـا

هل رأى الحب سكارى مثلنا؟
كم بنينا مـن خيـال حولنـا

ومشينا فـي طريـق مقمـر
تثـب الفرحـة فيـه قبلنـا

وضحكنا ضحك طفلين معـاً
وعدونـا فسبقـنـا ظلـنـا

وانتبهنا بعد ما زال الرحيق
وأفقنـا ليـت أنّـا لا نفيـق

يقظة طاحت بأحلام الكـرى
وتولى الليل والليل صديـق

وإذا النـور نذيـرٌ طـالـعٌ
وإذا الفجر مطلٌ كالحريـق

وإذا الدنيـا كمـا نعرفـهـا
وإذا الأحباب كلٌّ في طريق

أيـهـا السـاهـر تغـفـو
تذكـر العهـد وتصـحـو

وإذا مـا الـتـأم جــرح
جــدّ بالتـذكـار جــرح

فتعـلّـم كـيـف تنـسـى
وتعـلّـم كـيـف تمـحـو

يا حبيبي كل شيـئٍ بقضـاء
مـا بأيدينـا خلقنـا تعسـاء

ربمـا تجمعـنـا أقـدارنـا
ذات يوم بعد ما عز اللقـاء

فـإذا أنكـر خــل خـلـه
وتلاقينـا لقـاء الغـربـاء

ومضى كـل إلـى غايتـه
لا تقل شئنا فـإن الحظ شـاء

اللى يعيش يا ما يشوف على الفيس بوك

ظاهره غريبه اوى الفيس بوك كل يوم تلاقى مئات الجروبات الجديده فيه افكار حلوه و فيه افكار جديده و فيه افكار مبتكره
لكن اكتر حاجه بتغظنى فى الجروبات الجروبات بتاعه الاحداث
يعنى ايه جروبات الاحداث اقولكم يعنى جروب ظريف لطيف ارتبط انشاءه بحدث معين سواء كان عربى او دولى او محلى
ازاى يعنى ؟؟؟؟؟
اقولكم ازاى موضوع غزه مثلا اتعمل فيه كام جروب نحن ندعم غزه و لا للحرب على غزه فوق ال 500 جروب و كلهم نفس الفكره تقريبا
و نفس الكلام كمان
و قبل كده موضوع الاضراب بتاع 6 ابريل اتعمل 140 جروب
طب قبل ما تعملوا الجروب يا عالم اعملوا بحث عن الجروبات
اه 10 جروبات ماشى لكن 500 جروب و لا 140 جروب على ايه و بمجرد ما تخلص الحكايه الجروبات تهدى و ابقى قابلنى لو عبرتك تانى برساله

سهر الليالى

لما بسمع الاغنيه دى بحس بأحساس بالشجن مش عارف ليه
موسيقى صاخبه و مفرحه و لكن كلمات حزينه بتفكرنى بذكريات كتير مش لازم يكون نفس الموقف
بس بتحسسنى بطبيعه الحياه ان الدنيا زى ما بتدى زى ما بتاخد
تحس ان الرحبانيه بيحولوا يضيفوا للاغنيه روح المرح و الهيصه عشان تناسب المسرحيه
لكن لو قريت كلمات الاغنيه تحس بحاله الحزن اللى عاوز يوصلهالك الرحبانيه
ان كل حاجه بتروح و كل حاجه زى ما بتبتدى بتنتهى
مش عارف الناس حاسه باللى حسه لما بيسمعوا الاغنيه و لا الموسيقى بتاعه الاغنيه بتطغى على الاغنيه نفسها
و لا انا اللى بس حاسس كده
مش عارف الناس حفظه الكلمات فقولت اكتبها


شو كانت حلوة الليالي والهوى يبقى ناطرنا
وتجي تلاقيني وياخذنا بعيني
هدير المي والليل

كان عندنا طاحون ع نبع المي
قدامه ساحات مزروعة في
وجدي كان يطحن للحي
قمح وسهريات
ويبقوا الناس بهلساحات
شي معهن كياس شي عربيات
رايحين جايين ع طول الطريق
تهدر غنيات
اه يا سهر الليالي اه يا حلو على بالي
غني اه غني اه غني على الطرقات
ياي ياي ياي يا سهر الليالي ياي ياي ياي يا حلو على بالي
غني اه غني اه غني على الطرقات

وراحت الايام وشوي شوي
سكت الطاحون ع كتف المي
وجدي صار طاحون الذكريات
يطحن شمس وفي
اه يا سهر الليالي اه يا حلو على بالي
غني اه غني اه غني على الطرقات
ياي ياي ياي يا سهر الليالي ياي ياي ياي يا حلو على بالي
غني اه غني اه غني على الطرقات

نص حاله

مش عارف النهارده عاوز اكتب و اكتب و اكتب و اكتب مش مهم حد يقرا المهم انى اكتب و خلاص
احساس غريب ان الواحد يحس انه فى نص حاله
نص حاله ان انتا تبقى سعيد وحزين تعبان و مستريح
مش عارف احساس غريب زى ما اصاله بتقول فى اغنيتها الجديده

نص ضحكة نص فرحة نص راحة

كل حاجه بتناقضاتها حاسس بيها النهارده
الكدب و الصدق
الحب و الكراهيه

يا ترى حد حس بالاحساس ده

انتا بتسمع محمد منير ياه ده انتا قديم اوى

مش عارف ليه كل ما اقول للناس اللى بتعرف عليهم لما يوجهه الاسئله المعتاده فى اول مره بتكلم معاه
انتا بتسمع مين اقولهم محمد منير يقولولى ياه ده انت قديم قوى مش عارف كأنى قلت منيره المهديه و لا ام كلثوم و لا صالح عبد الحى بيحسسونى ان منير حاجه قديمه اوى زى دول لاء و ايه يقولولى يا عم حد يسمعه ده لا صوت و لا كلام و لا شكل مش عارف كأنى جى من كوكب تانى و انا مش حاسس
ماله منير يا جدعان ليه اغانى حلوه هو بالشكل و لا بالصوت مهو كان فيه زمان محمد عبد الوهاب و كان فيه مغنيين شكلهم مش حلو اوى و لا هما بيقارنوا بالشكل و الكليب
و ابقى عملت كبيره لو واحد قالى بتحب تامر حسنى و اقوله لاء يقولى معقوله مفيش حد بيحب تامر ده نجم الجيل ده اسطوره ده مش عارف ايه
انا مالى يا عم اسمع اللى عاوزه و اللى مش عاوزه لاء فيها ايه منير اسمعه و مسمعش تامر انتوا مالكم واحد يقولى يا عم تامر حسنى حلو و لا عشان البنات بتحبه و انت غيران
اقوله ايه ده غيران من مين يا عم كل واحد يسمع اللى هو عاوزه هى عافيه يا عم اسمع تامر و انا اسمع منير برحتى يا عم اخلع من دماغى بقا
و ناس تقارن ده بده و يقولوا ده تامر عمل فى خلال الكام سنه اللى ظهر فيهم زى منير
اقوله يا عم يعمل زى ما هو عاوز انا مالى برضه
يا جماعه جايز انا غلطان هو انا لو سمعت منير ابقى قديم و لا ايه حد يرد عليا
لازم امشى مع الموضه الغنائيه
اسمع تامر و هيفا عشان ابقى من جيل الشباب
مش عارف انا ايه الناس دى

ايه معنى الصداقه عندكم

مش عارف ايه معنى الصداقه بجد لغايه دلوقتى معانى كتيره شفتها فى حياتى ناس بتقول ان الصداقه على الحلوه و المره مع بعض و ناس بتقيسها بعمل اختبارات لصحابها زى اختبار الفلوس ( يعنى مثلا يسأل صاحبه معاك تسلفنى و لو صاحبه معاه يديله )
و فيه ناس اختبار الجدعنه و عدم الكلام من ورا الظهر ( يعمل معاك مشكله و يشوف حتتكلم عليه ازاى من ورا ظهرك )
و فيه اختبار اسمه دخول البيوت ( يعنى يدبسك فى عزومه و يشوفك حتدخله و لا لاء بيتك )
اختبار الاسرار ( لازم تقوله على سرك و الا متبقاش صاحب ليه مش مؤتمنه على سرك )
اختبارات كتير مش عارف اقولهم بس يا ترى الصحاب كده بس دخول بيوت و فلوس واسرار و بس
مش عارف انا ممكن اصاحب صاحب ميعملش معايا اى حاجه من دى بس العلاقه علاقه احترام و حب و تقدير ما بين الاتنين
انا عن نفسى عمرى ما اعمل اى اختبار من دول بس فيه ناس لازم تعملهم و يا ويلك يا سواد ليلك لو وقعت فى اى اختبار من دول متبقاش صاحب و لا صديق
مش عارف حاجه تحير لو حد عنده اجابه يقولى

ازيكم

انا قولت اول حاجه احطها فى مدونتى تعريف لنفسى
انا انسان بسيط عايش فى دنيا كبيره اوى فيها الحلو و الوحش فيها الطيب و الشرير فيها الكويس و الفاجر
فيها كل حاجه تتخيلوها ونقيضها
خير و شر حياه و موت حب و فراق تضحيه و أنانيه و حاجات كتير اوى
مش عارف ايه اللى خلانى اعمل مدونه و لا عمرى فكرت اعملها بس قلت اجرب اعمل مدونه اشمعنى الناس التانيه عملين و انا مشفتش المجال ده و لا اتعاملت معاه خالص بكتيره بقرا مدونه او اتنين كل شهر و لا ابص فيها حتى فقولت اعمل مدونه اكتب فيها اللى انا حاسس بيه اى حاجه اكتبها مش كل انسان حر يكتب اللى هو عاوزه و لا ايه
انا قولت مش حعرف اعمل حاجه فيها بس قولت اجرب
انا يا جماعه اسمى محمد حميده
لسه طالب فى اخر سنه فى خدمه اجتماعيه اسكندريه
عمرى 22 سنه
قلت اطلق لدماغى العنان فى المدونه دى
اى حاجه تيجى فى دماغى اكتبها
اى حاجه متضايق منها اكتبها
جايز اطلع الكبت اللى جوايا