كل عيد ثوره و انتم طيبيبن

انا بدور على اغانى الفتره دى السنه اللى فاتت لقيت موقع فيه معظم اغانى الثوره و معظم الاغانى اللى اتغنت لجمال عبد الناصر و قعدت اسمع مغنييين معروفين ليا و مطربين مش معروفين زى ( إبراهيم حمودة ، أجفان الأمير، احلام ، أحمد سامى ، أحمد عبد القادر ، إسماعيل شبانة ، الحفنى أحمد حسن ، برلنتى ،ثريا حلمى ، دنيا ذاد ، جلال سالم ، حورية حسن )0 و غيرها طبعا من الاغانى الشهيره لام كلثوم و عبد الحليم حافظ و غيرهم كتير اوى

قلت بمناسبه الثوره اسبيكم مع الكنز ده اكتر من ١٢١٧ اغنيه عن جمال و الثوره و كده

اضغط على اسم الاغنيه للاستماع

http://nasser.bibalex.org/Songs/SongsMain.aspx?CS=1&x=7

فيه شئ غريب بيدور هنا

الموضوع ده كنت كاتبه من فتره فى Notes على الفيس بوك



فيه شئ غريب بيدور هنا
حاسبوا ياناس فيه شئ غريب
فيه ناس اكيد مش مننا
ويا خوفي لعيارهم يصيب

بجد اتفجعت و اترعبت من كميه الجروبات الملحده على الفيس بوك و اللى بتتكلم على الالحاد
و المشكله فيها ناس ممكن يكونوا صحابك او صحابى بينشروا افكار مسمومه مش بيقبلها دين و لا شريعه و لا مله
الالحاد و بس غير بقا حبه استهزاء بالرسل و بسيدنا محمد و بسيدنا عيسى
حتى الشريعه الاسلاميه و المسيحيه مسلمتش منهم
بيشككوا فى وجود الله ووجود العرش ووجود ملائكه و حاجات بالعبيط
دول بقا يتعملوا ازاى ولا ينفع معاهم نقاش و لا ينفع معاهم نصيحه دول يتسابوا كده ربنا يتوالهم بقا
و محدش يدخل الجروبات بتاعتهم و لا يناقشهم بمجرد دخولك لجروبهم و مناقشتهم مش نصره لدينك ابدا انتا كده بتحقق هدف عندهم كبير اوى و هو تشكيكك فى دينك
و جروبات بقا زى ما بنقول من العيار التقيل اللى يسميلك اسامى متنقيه على الفرازه
اللى يعملك جروب اسمه الله فى اجازه و اللى يعملك جروب اسمه
ومن بدل دينه فاحترموه
و مش عارف الملحدين العرب و هيصه بقا
يا جماعه راجعوا اصدقائكم راجعوا جروبات مشتركين فيها
متفرحوش بعدد الاصدقاء الكتير
شوفوا مدونات صحابكم مكتوب فيها ايه
الملحد ممكن يبقى اسمه
محمد
محمود
احمد
مصطفى
مينا
مايكل
ابراهيم
مش لازم اسم غريب
و اللى مش مصدقنى يبعتلى رساله و اوريله جروبات و ناس للاسف كنت ضايفهم عندى
خلى بالكم الخطر يا جماعه بجد
اعلى نسبه شباب من دول عربيه فى مواقع التعارف على الفيس بوك
اعلى نسبه عرب فى مواقع التعارف على الفيس بوك
اعلى نسبه مراهقين من دول عربيه فى مواقع التعارف على الفيس بوك
بيقولوا لابنك متصليش
بيقولوا لبنتك متتحجبيش
أفكارهم هدامه
افكارهم بتشوه ديناتنا
افكارهم بتشوه معتقدتنا
ارجوكم خدوا كلامى بجديه متقولوش عيل صغير
فيه خطر جامد علينا و على شبابنا

و تعالى على حجرى يا رمان

فيه أغنيه بتتقال فى الافراح الشعبيه و بتقول ( و أدحرج و اجرى يا رمان و تعالى على حجرى يا رمان ....................... ) أغانى من زمان بسمعها غريبه اوى ، دايما بحب أسمع الاغانى دى مش عارف ليه و كنت بحب اوى لو حد عزمنى على فرح فى حته شعبيه عشان اسمع الغنى بتاعهم و اغانى الحنه بتاعه بكار اللى اولها بيقول ( بكار ويا رشيده قضوا رحله سعيده ................ ) و الاغانى دى على الرغم انها ملهاش مؤلف و لا مغنى معروف و لا اتقالت امتى إلا انها موجوده فى معظم المحافظات و انا فى اعتقادى انها موروث شعبى او اشبه بالفلكلور الشعبى بتتقال فى أفراحنا و مناسبتنا ، يا ترى انتا عندك اغانى من الأفراح الشعبيه ممكن تقولهالنا

حاجه تجنن حاجه تغيظ

لأول مرة.. المرحلة الأولي في التنسيق بـ 50 % فى مكتب تنسيق القبول بالجامعات


عفوا انت لا تقرأ موضوع من الخيال العلمى و لكنه حقيقه واقعه فى مصر

و ده الخبر

في سابقة هي الأولي يبدأ مكتب تنسيق القبول بالجامعات غدًا وحتي الأحد المقبل تلقي رغبات طلاب الثانوية العامة دون التقيد بالمجموع مما يعني السماح لجميع الناجحين وعددهم 35 ألفا و379 طالبًا من الحاصلين علي 50% فأكثر بتسجيل رغباتهم.

وقال د. هاني هلال وزير التعليم العالي: إنه سيتم فتح «الموقع الإلكتروني للتنسيق مساء اليوم الثلاثاء لتصفح التعليمات لافتًا إلي أنه ولأول مرة سيكون الرقم السري للطالب هو نفسه رقمه القومي وأن الطالب سيعرف الكلية التي ترشح لها عن طريق البريد الإلكتروني أو S.M.S ترسل له علي تليفونه الشخصي.

في السياق ذاته شهد اجتماع لجنة تعليم الشوري أمس والمخصص لمناقشة نتيجة الثانوية مشادات كلامية ساخنة بين النواب و الوزير د. أحمد زكي بدر الذي وصف ما أثير حول نتيجة الثانوية واعتبارها الأسوأ منذ عدة سنوات بالإفك والافتراء وتزييف الحقائق.

وقال بدر إن الامتحانات تقدم لها في المرحلة الثانية 71 ألف طالب وبلغت نسبة النجاح 50.5% وهؤلاء أنفسهم كانت نسبة نجاحهم في المرحلة الأولي للثانوية العام الماضي 41%.

وفاجأ الوزير النواب بورقة إجابة إحدي الطالبات والتي حصلت علي درجات عالية في الكيمياء في امتحان المرحلة الأولي للثانوية وهذا العام في المرحلة الثانية حصلت علي 0.5% وقال هذه الطالبة تشكو وتبكي وتصرخ في وسائل الإعلام وهذه ورقة إجابتها والله خسارة فيها الـ 0.5%.

النواب بعد عرض الورقة قالوا للوزير: ده تصحيح وتعليم ولا داخلية.. الطالبة نشرت شكواها أمس فقط، فرد بدر: «أرجو أن نتقي الله في أبنائنا وأبناء الناس جميعًا سامحكم الله وربنا يهديكم».


و اللى مش مصدق

http://www.rosaonline.net/Daily/News.asp?id=72909

عندما لا يكون 1+1 += 3

فى معظم الاحوال كنا بنعلم العيل الصغير الجمع نقوله بص يا حبيبى لو واحد حطينا عليه واحد يبقى كام يبقوا اتنين ده اللى احنا متعودين عليه
المهم بقا عيل صغير من العيله جه و قالى عمو واحد + واحد كام و انا ببلاهه قلتله 2 قالى لاء تلاته قلتله ازاى يا حبيبى قالى عمو علاء و طنط الهام مش كانوا واحد وواحدقالى و جابوا اسلام قلتله اه قالى ازاى بقوا تلاته قالى خلاص عمو علاء و طنط الهام بقوا عمو علاء و طنط الهام و اسلام كده بقوا 1+1 =3 تنحت انا ، بصراحه معرفتش اقول ايه للولا صح علاقه الجواز مينفعش تخضع للقاعده دى او ينطبق عليها و الولا قعد يزن عليا قلتله مش كله يا حبيبى يعنى انتا و اخوك ممكن تبقوا تلاته قالى اه لو بابا و ماما عاوزين نبقى تلاته حنبقى تلاته انا بصراحه مقدرتش امسك نفسى من الضحك و الولا بقا استنتج قاعده جامده اوى عجبتنى قالى يعنى لما واحد وواحده بيتجوزوا ممكن يبقوا تلاته قلتله اه و ممكن كمان يبقى اربعه او خمسه او سته الولا اقتنع قالى خلاص 1+1 = 2 لاى حاجه الا المتجوزين قلتله شاطر و من ساعتها الولا كل ما يشوفنى يقولى يا عمو طنط مش عارف مين و عمو مين كانوا واحد وواحد بقوا تلاته

النصب عن طريق الدعايا بالجروبات عن كورسات

انا النهارده حتكلم فى موضوع حصل معايا شخصيا و هو عباره عن نصب عن طريق استغلال اصحاب الجروبات فى الدعايا عن كورسات طبعا الكورسات بتبقى حقيقيه و الناس بتروح و شهاداتها كويسه و كل حاجهع بس المشكله فى الشخص اللى بتتعامل معاه
الموضوع انه جالى رساله انى اشترك فى الدعايا للكورسات دى قلت و ماله يا بنى الواحد يجرب نصيبه بدال مش حاجه عيب و لا حرام نجرب نشوف بدأت اتصل بالشخص المسئول و دار ما بينا حوار بسيط و قالى ان كل شخص حيسجل عندك من الدعايا اللى حتعملها حتاخد 10 % من اجمالى سعر الكورس قلت طب ازاى حعرف اللى سجل قالى شيت على جوجل بيبان اللى سجل و اللى مسجلش و بمجرد ما تخلص الدوره حبعت ليك الاسامى اللى اشتركت و تطلعهم من عندك عشان تطمن قلت لو 50 واحد سجلوا عندى و 3 هما اللى راحوا الكورس انا برضه اللى كسبان و بدأت العمليه و كل يوم كلام على الاميل و ابعت دى و ابعت دى قلت ربك يكرم و نطلع بسبوبه حلوه و خلص الكورس استنى يوم اتنين تلاته اربعه خمسه و لا حس و لا خبر تليفون مش بيترد عليه أيميل مكنش بيتقفل بقى بيتقفل على طول قلت ايه اتنصب عليا و لا ايه
فضلت ورا التليفون لغايه ما رد المسئول و يصبرنى يقولى تعبان اقول و ماله خلينا وراه دوره دخلت تانى و مكنش فيه وقت و ماله الصبر حلو و اخيرا بعت الكشف ملقتش من ال 50 واحد و لا واحد قلتلوا كده مفيش حد أشترك قالى لسه فيه 10 لسه متفرغوش و ممكن يبقى منهم واحد و يوم يجر يوم يوم يجر يوم اتصلت تانى قالى و الله مش ناسيك و مش عارف ايه و اجازتى حقعد و اشوفلك و معلش و بتاع و من ساعتها و لا حس و لا خبر فأرجو اصحاب الجروبات ميتعبوش نفسهم و لا يشتركوا فى دعايا و لا حاجه لان تقريبا الحكايه كده نصب فى نصب
و يا ريت اللى عنده كلام غير كده يقول

و تعالى على حجرى يا رمان

فيه أغنيه بتتقال فى الافراح الشعبيه بتقول (و اتدحرج و أجرى يا رمان و تعالى على حجرى يا رمان ده أنا حجرى حنين يا رمان يا خدك و يميل يا رمان ) أغانى غريبه اوى بسمعها فى الافراح و القعدات الشعبيه اللى بموت فيها . كنت بحب اوى لو حد عزمنى على فرح فى حته شعبيه عشان اسمع الغنى بتاعهم . و اغانى الحنه بتاعه بكار اللى اولها بيقول ( بكار ويا رشيده قضوا رحله سعيده ................ ) و الاغانى دى على الرغم انها ملهاش مؤلف و لا مغنى معروف و لا اتقالت امتى إلا انها موجوده فى معظم المحافظات و انا فى اعتقادى انها موروث شعبى او اشبه بالفلكلور الشعبى بتتقال فى أفراحنا و مناسبتنا ، يا ترى انتا عندك اغانى من الأفراح الشعبيه ممكن تقولهالنا .

هل ستبدأ غدا ثوره المدخنين

النهارده و أنا رايح اشترى سجاير لوالدى بديله 5 جنيه عشان أخد علبه ( ال . أم ) قالى يا باشا ناقص 2 جنيه قلتله ليه قالى منها لله الحكومه زودت على السجاير الاجنبى 2 جنيه و السجاير المصرى 1.25 جنيه يعنى ال ( ال . أم ) بقت ب 7 جنيه و حتبقى السجاير الكليبوترا ب 4.25 او 4.5
فى بالى بقا يا ترى المدخنين فى مصر حيسكتوا و لا حيعملوا ايه خاصه ان كل الشعب تقريبا مدخن من الكبير لطلبه المدارس و الجامعات من الفقير للغنى من النقاش للوزير الايام اللى جيه حتبين ايه اللى حيحصل ؟ فى رأيك انتا حتحصل ثوره للمدخنين فى مصر و لا عادى زى غيرها ؟