أنا و اللغه العربيه و اللغه العاميه

من السهل جدا ان نقوم بكتابه موضوع باللغه العاميه حيث أنها اللغه المتداوله التى يمكن للجميع قراءتها لأنها اكثر تداولا من اللغه العربيه الفصحى و انا اجد سهوله فى ذلك أن اكتب أى من الموضوعات العالقه فى ذهنى باللغه العاميه و لكننى فجأه بدون سابق أنذار قررت ان اخوض التجربه باللغه العربيه الفصحى أننى لا أدعى فصحاتى فى استخدام اللغه العربيه و لكنها محاوله منى بذلك و يكفى لى شرف تلك المحاوله

شكرا للرئيس مبارك و وزراء حكومه احمد نظيف

ايه مش عاجبكم العنوان ،سامع واحد بيشتم من بعيد استنى بس انا بجد بشكرهم حتزعلوا منى تانى و تقلبوا الصفحه ، طب اقروا الاول و احكموا فى الاخر ، دايما كده متسرعين ، انا بشكرهم لسبب وجيه جدا لولا الفساد اللى كان موجود فى بعض وزراء الحكومه مكناش عرفنا ان شباب الفيس بوك و ال هاى فايف و التويتر يقدروا فى 18 يوم انهم يعملوا اللى المعارضه مقدرتش تعمله فى 20 سنه ، مين يصدق ان شباب الفيس بوك يقدر يقف و يكون لجان شعبيه فى الشوراع تحمى البيوت و فيه منهم شباب واقفين ينظموا المرور و منهم شباب واقفه تراقب الاسعار فى السوق بجد شكرا شكرا لحكومه نظيف اللى ورتنا ان شباب مصر شباب زى الفل فيه خير كتير

و ماذا بعد ؟

و ماذا بعد ؟ سؤال بقاله مده معلق فى دماغى و مش لاقى اجابه عليه ؟ الرئيس استقال جميل جدا و الجيش مسك البلد زى الفل . بعد كده بقا فيه ايه .أصلاحات من المجلس الاعلى للقوات المسلحه و ماله مهو هو هو المجلس اللى قبل ما الرئيس يستقيل فى بيانه التانى ضمن كل حاجه تتنفذ و الشعب مصدقش . يا ترى لو الناس معجبهاش حكم الجيش ايه اللى حيتم حيعملوا مظاهره مليونيه على الجيش ؟ و يا ترى الجيش حيعمل ايه معاهم أسئله كتيره اوى فى دماغى ممكن تقول عليا سودوى أو متشائم لكن بجد ماذا بعد