بعد ١٧ سنه في التدوين نبدأ مشروعنا "امثال العوام حتى القرن ال١٩

في يناير ٢٠٠٩ بدأت رحلتي مع مدونة حاجات و محتاجات في دماغي كمساحه شخصيه ليا للكتابه و التفكير.  
و كانت في قمتها في النشر في اول ٤ أو ٥ سنين و بعد كده قل التدوين عليها و بدأت اروح للفيس.  

و النهارده بعد ١٧ سنه، بعلن عن تحويل المدونه لمكان بحثي جديد و متخصص إن شاء الله في مشروع شغال عليه بقالي سنين بعنوان امثال العوام حتى القرن التاسع عشر.

المشروع بيتكلم عن ايه

جمع و تحليل و توثيق الامثال الشعبيه العاميه اللي كانت موجوده لغايه القرن التاسع عشر الميلادي من خلال ٣ محاور:  

١. مصر كنموذج:  و ده كان اصل المشروع و الحمد لله جبت مراجع ممكن لقبل ١٧٠٠ ميلادي و حيكون عن طريق جمع الامثال العاميه من كتب و دراسات اتكلمت عن الامثال أو الحياه الاجتماعيه في مصر في الفتره دي لغايه سنه ١٨٩٩  

٢. سوريه كنموذج: عن طريق جمع الامثال العاميه من كتب و دراسات اتكلمت عن سوريه في الفتره دي لغايه سنه ١٨٩٩  

٣. لبنان كنموذج: عن طريق جمع الامثال العاميه من كتب و دراسات اتكلمت عن الامثال أو الحياه الاجتماعيه في لبنان في الفتره دي لغايه سنه ١٨٩٩

ليه دلوقتي:

الحقيقه ان المشروع ده و مشاريع تانيه في التراث الشعبي  بقالي فيها اكتر من ١٠ سنين بس الإنسان دايما بيسعي للكمال بس انا عمري ما حقدر و لا حد حيقدر يوصله بس لازم البدايه و انا نويت. في ظل كميه الكتب اللي بتنزل على الامثال و معظمها واخد من مراجع حديثه نسبيا كان ليها طبعا السبق، حبيت ابص على اصل المراجع و ما قبل المراجع دي لعل و عسى اكتشف امثال جديده ممكن تكون المراجع سقطت منها أو اغفلها الجامع للامثال.

حننشر ايه هنا:

ستكون المدونة هي المنصة الرسمية لنشر مقتطفات ومقالات دورية من المشروع. كل اللي حيتنشر هنا هو جزء أصيل من 3 كتب بحثية قيد الإعداد حالياً للنشر الورقي.

دعوة للمتابعة و المشاركه :

بدعو كل المهتمين بالتراث الشعبي والأدب العامي لمتابعة السلسلة. و حيكون النقاش مفتوح لإضافة غريب الأمثال اللي سمعتموها من الأجداد أو الآباء.  

للتواصل: mohamedhemida@gmail.com

حقوق النشر والملكية الفكرية

جميع المواد المنشورة في هذه المدونة اعتباراً من ١٨ يونيو ٢٠٢٦ هي جزء من مشروع بحثي خاص بالباحث *محمد أحمد حميده*.  

يُمنع النقل أو الاقتباس أو إعادة النشر إلا بإذن من الناشر.  

جميع الحقوق محفوظة محمد أحمد حميده © 2026

#أمثال_شعبية #تراث_مصري #تراث_شامي #القرن_التاسع_عشر #أمثال_العوام #محمد_حميده #حاجات_ومحتاجات #تاريخ_شفاهي #أدب_عامي #توثيق_التراث_الشعبي

أنا أقرأ ، أنا موجود

 

أعترف أني بدأت أقرأ بالتدريج و  لولا الاصدارات دي مكنتش اتعلمت يعني ايه قرايه انا فاكر زمان كانوا  ماما و بابا بيجيبولي   مجله سمير التابعه لدار الهلال و مجله علاء الدين التابعه لمؤسسه الاهرام  و اصدارات سماش و فلاش لخالد الصفتي.و ميكي جيب اللي كانت تابعه لدار الهلال قبل ما تروح لنهضه مصر
و لما كبرت شويه دخلت على  سلسله رجل المستحيل و ملف المستقبل  لنبيل فاروق و ما وراء الطبيعه لاحمد خالد توفيق اللي كلهم كانوا بيصدروا عن  المؤسسه العربيه الحديثة
و بقيت مدمن دلوقتي على اصدارات الهيئه العامه لقصور الثقافه و اصدارات الهيئه العامه المصريه للكتاب و المجلس الأعلى للثقافه ، لولا كل الاصدارات دي مكنتش فكرت اني اشتري كتب او ابدأ في القراءه أصلا

سلاسل الكتب الشهريه في مصر

 مش عارف امتى بدأ اصدار السلاسل الشهريه في مصر للكتب بس اعتقد ان اقدم دار هي دار الهلال و كانت بتقدم سلسله اسمها كتاب الهلال و كانت سلسله شهريه ، انا من قريب جبت عدد من الإعداد القديمه كان كتاب عبقريه محمد للأديب  عباس محمود العقاد ، و كان منشور تقريبا في ابريل ١٩٥٢ و كان كتيب صغير بحجم كف الايد ،  و كان فيه برضه الدار القوميه للطباعه و النشر و كانت بتنزل الكتاب الماسي و اعتقد انها كانت في سنه ١٩٥٩ و لقيت عندي عدد منها مسرحيه المحروسه و كانت العدد ١٥٩ لسنه ١٩٦٥ ، معرفش كان نوع الاصدار شهري و لا أسبوعي و لا حاجه تانيه ابقى اشوف ، و في ١٩٧١ صدر قرار جمهوري بأنشاء الهيئة العامه المصريه للكتاب ، و بدأت الهيئه في تنويع اصداراتها بين الشعر و للفن و الادب لغايه يومنا و ظهرت أعمال كامله لنجيب سرور و صلاح عبد الصبور  و عبد الرحمن الابنودي و بيرم التونسي و جمال حمدان اللي ظهرت من سنين نسخه من اصدار الهيئه العامه للكتاب تقريبا بعد انتهاء عقد دار الهلال لكتاب شخصيه مصر  و شعراء و كتاب كتير ، و اعتقد ظهر في نفس الوقت كتاب اليوم الصادر عن دار اخبار اليوم و كان شهري و كان فيه اصدارات زي اصدارات احمد رجب و محمود السعدني و غيرهم  و تقريبا لازال موجود لغايه دلوقتي ، و كان فيه كتاب اقرأ التابع لدار المعارف بس للاسف معتقدش اني عندي ليه معلومات بس أتذكر في مكتبه والدي فيه كتابين من السلسله  و كتاب الجمهوريه التابع لجريده الجمهوريه و برضه نفس وضع كتاب اقرأ ، و فيه اصدارات شهريه تانيه ممكن اكون معرفهاش أو نسيتها  بس دول أشهرهم ليا ، و ظهر في التسعينات مشروع مهرجان القراءه للجميع تقريبا ١٩٩٢ أو ١٩٩٣ و ده بقى عاوز بوست لوحده .

لما الشتا دق البيبان

 معقول ارجع اكتب في المدونه تاني بعد اكتر من ٩ سنين 

ليه لاء ، المدونه دي بقالها فوق ال١٢ سنه تقريبا ، عملتها و انا لسه معنديش تجارب ، اللي في قلبي على لساني ، نضجت دلوقتي ممكن ، كبرت اكيد ، التجارب علمتني ، اخدت صدمات و مفاجأت ، حد كنت بحبه و انتهى من حياتي ، و ناس دخلت في حياتي و ناس اكتر خرجت ، مش عارف حكتب تاني في المدونه و لا لاء ، بس حنيت المدونه لما الشتا دق البيبان

بموت فيكي

بموت فيكي يا عصفورة في عشي و فوق غصني سكنتي فيه و ياما صنتية و غنيتي مواويلك و اغانيكي ياما ليا
و يا سمكة فى بحر هوايا نطيتي و عمتي فيه و يا ما شربتي من بحري و ما شتكتيش
و يا وردة في وسط غصوني ربيتك و يا ما تحملتي جفاف أرضي و لا نشفتي
و يا سحابة قابلتي كتير في سماواتي شرر رعدي و لا نزلتي و لا ضعفتي
يا حبى يا اول حب في حياتي

من بسمه لمحمد

حبيبى ملاكى الحارس فى الليل يسهر على راحتى ويحرسنى ويترقب انفاسى ويترقب اهاتى ويأتى لاحلامى ، 

 اما النهار فهو مؤنسى ومحقق بهجتى وراحتى يعارضنى بلطف ويغلبنى بحنيه ويداهمنى بعمق ويحسنى لاقصى درجه ويحبنى لدرجه العشق حتى يشعرنى أننى جزء منه و هو جزء منى حبيبى لا تغفل عيناه عنى ، حبيبى ملاكى الحارس

من بسمه الامل لمحمد 

 22/3/2013

كان يا ما كان

كان يا ما كان كان فيه ولد عايش فى الدنيا وحدانى قلبه مش لاقى نصه التانى و فجأه راح مكان فى اخر لحظه و لقى نص قلبه التانى و قال هى دى بأذن المولى أم عيالى و قرر أنه ميعش فى الدنيا دى من تانى وحدانى و ربنا يسهله و يتجوزوا و يعيشوا فى تبات و نبات و يجيبوا صبيان و بنات